Sonni sigur farvæl móti Russlandi

02.05.2021 - 14:22
ÍtrótturHondbóltur
Sonni sigur farvæl móti Russlandi
Dysturin hjá føroyska hondbóltslandsliðnum við monnum ímóti Russlandi seinnapartin verður hin seinasti hjá venjaranum, Sonna Larsen
Sonni Larsen stendur á odda fyri Føroyum fyri seinastu ferð seinnapartin
 

Fríggjakvøldið kom sigurin, sum føroyska hondbóltslandsliðið við monnum og venjarin, Sonni Larsen, høvdu bíða eftir. Ein javnur dystur endaði við føroyskum eitt máls sigri, og sostatt var ein hin størsta løtan í føroyskum hondbólti yvirhøvur veruleiki.

Fyrr sama dag varð greitt, at danski venjarin, sum í fýra ár hevur staðið á odda fyri liðnum, ikki slapp at halda fram. Í staðin skal Peter Bredsdorff-Larsen, sum er eitt munandi kendari hondbóltsnavn, standa við leiðsluni.

Tað merkir, at Sonni Denis Vahlgreen Larsen stjórnar liðnum fyri seinastu ferð, tá Russland vitjar seinnapartin.

 - Tað snýr seg ikki um meg, segði Sonni Larsen eftir dystin móti kekkum. 

 - Tað snýr seg um, at dreingirnir hava spælt góðan hondbólt. Restina kunnu vit tosað um eftir dystin sunnudagin.

Múrurin brotin

Í føroyska hondbóltsheiminum hevur sigurin á Kekkia ligið í luftini í eina tíð. Føroyar hava tapt tepurt fyri Ukraina tvær ferðir, spælt javnleik móti Montenegro og vunnið á Luksemborg. 

Nú er spurningurin, um Sonni Larsen og Dia Midjord, sum eisini takkar fyri seg sum hjálparvenjari, megna at leggja ein stein omaná varðan, sum er laðaður síðstu árini. 

Um tað skal eydnast, má avrikið vera minst líka gott sum ímóti Kekkia fyri tveimum døgum síðani. Føroyar taptu í Moskva - dysturin endaði 24-31 í einum ójavnum avriki - men á heimavølli eftir ein søguligan sigur, kann nógv vera broytt.

Stjørnuskotið, Elias á Skipagøtu, og liðskiparin, Kjartan Johansen, vóru ikki við á útivølli móti russarum. Tað eru báðir bakspælararnir hesa ferð, og at tað ger stóran mun í álopsspælinum var sjón fyri søgn móti Kekkia.

Dysturin ímóti Russlandi byrjar klokkan 17.00. Kringvarpið sendir dystin beinleiðis í sjónvarpinum frá klokkan 16.40.

Er kopiera
Nýggjastu sendingar í ÚV
Sunnudag 16. mai
Helena Samuelsen er gestur í Brunsj
124277
Leygardag 15. mai
Jambalaja 150521
124271
Nýggjastu sendingar í SV
Hósdag 13. mai
Guðstænasta í Vesturkirkjuni
124199
Mánadag 10. mai
3-2
124088
Sunnudag 9. mai
Andakt við Øyvindi Bjerkenes
124018