HB vann 4-0

HB tykist trívast betur, nú liðið aftur sleppur at spæla á góða gamla Ovara vølli í Gundadali, sum hevur fingið nýtt graslíki. 

Í øllum førum smurdi HB Buducnost Podgorica úr Montenegro av í fyrra dystinum í UEFA Conference League kappingini í kvøld. 

Dysturin endaði 4-0 til HB. 

MYNDIR: Rakul Hansen / HB á Facebook

HB

Alt avgjørt upp á eitt korter

Tað gekk tó ein løta, áðrenn HB fekk glið á, tí tað var ikki fyrr enn í síðsta minutti av fyrra hálvleiki, at Michal Przybylski legði vertirnar á odda, tá hann hegnisliga setti bóltin í málið dygst inni við stólpan eftir eitt innlegg úr vinstru. 

Í grundini avgjørdi HB alt upp á eitt korter, tí tá 16 minuttir vóru spældir av seinna hálvleiki, stóð 4-0 á máltalvuni á Ovara vøllin í Gundadali. 

Michal Przybylski var aftur upp á spæl í 47. minutti, tá hann gjørdist leysur í brotsteiginum, og skeyt bóltin inn við handara stólpa. 

Pætur Petersen skoraði kanska vakrasta málið til 3-0 í 58. minutti.

Og í 66. minutti fekk HB brotsspark, sum Daniel Johansen setti trygt, og eitt sindur frekt, í netið. 

HB, Daniel Johansen

Tóktist ikki so stórur munur á

Suni Merkistein segði frá dystinum í útvarpinum, og hann sigur um dystin, at dysturin ikki tóktist so ójavnur, sum úrslitið bendir á. 

Gaman í, var HB tað vandamiklari liðið, men tað var lítið í fyrra hálvleiki, ið bendi á, at tað fór at koma eitt skrædl. 

Kanska var tað fyrsta málið, ið gjørdi, at HB-spælararnir fingu meira pláss. Og kanska gjørdi innskiftingin av Hilmari Leon í hálvleikinum eisini, at HB fekk betri tak á frammi á vøllinum. 

Í øllum førum var Hilmar Leon við í nógvum í seinna hálvleiki. 

HB, Hilmar Leon

So niðurstøðan er, at hóast liðið úr Montenegro ikki var "fyri nothing", sum tikið verður til, so má nú má fara at bragda hjá HB í evropeiskum fótbólti. 

Útgangsstøðið til seinna dystin á útivølli í Montenegro týskvøldið kundi ikki verið betri. 

>>FRÁLÍKU MYNDIRNAR FRÁ DYSTINUM TÓK RAKUL HANSEN OG KUNNU SÍGGJAST Á FACEBOOK VANGANUM HJÁ HB

HB - Buducnost Podgorica 4-0 (1-0)

1-0 Michal Przybylski 45' 
2-0 Michal Przybylsk 47'
3-0 Pætur Petersen 58'
4-0 Daniel Johansen 66'