Steðgipláss skulu lagast til koyristólar

Strandfaraskip landsins og Landsverk eru biðin um at kanna umstøðurnar á steðgiplássunum hjá Bygdaleiðum fyri at vita, hvussu tey kunnu gerast soleiðis, at fólk í koyristóli kunnu brúka tey.

Tað sigur Jørgen Niclasen, landsstýrismaður, í svari til Jóhannis Joensen, løgtingsmann.

Bygdaleiðir hava 48 bussar, og allir hava lyftu til koyristólar.

Men øll steðgiplássini eru ikki gjørd soleiðis, at fólk í koyristóli kunnu brúka tey uttan nakað. 

Tillagingar

Neyðugt verður at gera tillagingar á nógvum bussteðgiplássum, sigur Jørgen Niclasen.

Hann hevur heitt á Strandfaraskip landsins og Landsverk um at kanna hesar umstøður og gera eina ætlan um, hvussu steðgiplássini við landsvegir kunnu betrast. 

Men ein stórur partur av vegakervinum er kommunalur, og tí er neyðugt, at kommunurnar eru við í hesum, sigur Jørgen Niclasen.