Jóhan á Plógv Hansen til Flensburg-Handewitt

Føroyski vongurin á danska hondbóltslandsliðnum, Jóhan á Plógv Hansen, skiftir til týska stórfelagið, Flensburg-Handewitt, eftir hetta kappingarárið.

Tað boðar týska felagið frá á heimasíðu síni.

Jóhan á Plógv Hansen hevur skrivað undir ein trý ára sáttmála við norðurtýska felagið, sum hevur havt eyguni við honum í trý ár.

Vongurin fór úr danska felagnum, Bjerringbro-Silkeborg til TSV Hannover-Burgdorf undan 2020/21-kappingarárinum. 

Í nýggja felagnum skal Jóhan á Plógv Hansen spæla saman við liðfeløgunum á danska landsliðnum, Mads Mensah, Simon Hald, Kevin Møller og Emil Jacobsen.

 - Vit gleðast um, at Jóhan skal spæla her. Hann telist millum bestu spælararnar á sínum plássi og hóskar væl til okkara spælistíl, sigur venjarin hjá Flensburg-Handewitt, Maik Machulla sambært heimasíðuni hjá felagnum.

Flensburg-Handewitt vann týska meistaraheitið í 2018 og 2019, men seinastu tvey árini hevur THW Kiel vunnið tað.