UEFA ásetir nýggja reglu: í minsta lagi ein kvinna á venjarabonkinum

HM-undankappingin hjá kvinnum byrjaði í síðstu viku. Føroysku kvinnurnar taptu 10-0 ímóti spaniólum á Tórsvølli í fyrsta dystinum.

A-landsliðið spælir í kvøld ímóti Skotlandi á Hampden Park.

Sum nakað nýtt í hesi undankappingini setir UEFA krav um, at evropeisku kvinnulandsliðini í minsta lagi hava eina kvinnu sum høvuðs- ella hjálparvenjara.

Tað skrivar danska kringvarpið.

Føroyska venjaratoymið mannað við einari kvinnu:

Føroyska landsliðið við kvinnum hevur ikki trupulleikar at liva upp til nýggju regluna hjá UEFA. Í januar mánaði skrivaði Fótbóltssambandið undir fýra ára sáttmála við Lene Terp, sum tók við sum høvuðsvenjari eftir John Petersen.

Aftur at Lenu Terp, høvuðsvenjara, manna tríggir menn venjaratoymið hjá A-landsliðnum við kvinnum: Christian Høgni Jacobsen er hjálparvenjari, Jákup Mikkelsen er málmansvenjari, og Eli Nolsøe Leifsson er kropsligur venjari.

Dysturin á Hampden Park ímóti Skotlandi byrjar klokkan 19.35.

Dysturin verður stroymdur á heimasíðu Kringvarpsins.