Skráseta ferðslumynstrið í Miðvági

Vága kommuna er farin undir royndarverkætlan at skráseta ferðslumynstrið í Miðvági fyri at síggja, hvar møguligir trupulleikar í ferðsluni eru, nær á degnum mest ferðsla er, og hvussu skjótt tey koyra. 

Eisini er møguligt at skráseta ferðamynstrið hjá fólki, sum ganga og súkkla, og møguligar vandar á leiðini, skrivar Vága kommuna.

Eitt termiskt myndatól er sett upp við ellisheimið Vesturvón. 

Myndatólið skrásetur ferðslu og mátar ferð. 

Skrásetur tal á bilum

Myndatólið vísir ikki hvør bilurin ella fólkið er, men skrásetur tal á bilum, um tað er bleyt ella tung ferðsla, og hvussu skjótt koyrt verður, vissar kommunan um.

Kanningin kann geva kommununi verulig tøl og dátur um ferðslumynstrið á staðnum, har børn og ungu ganga í skúla hvønn dag. 

Royndarverkætlanin varar í umleið fýra mánaðir, og er tann fyrsta av sínum slag í Føroyum.

Hon fylgir reglum hjá Dátueftirlitinum, skrivar Vága kommuna.