Sjónveik og blind skulu royndarkoyra bíleggingarskipanina

Strandferðslan hevur biðið Sjóndepilin um ráðgeving í sambandi við menningartilgongdina av bíleggingarskipanini.

Ætlanin er, at sjónveik og blind skulu royndarkoyra skipanina. Strandferðslan fær eisini ráðgeving frá kt-mennara, ið fyrr hevur ment skipanir, ið taka atlit at serliga tørvinum hjá fólki, ið bera brek.

Tað sigur Jørgen Niclasen, landsstýrismaður, í svari til Una Rasmussen, løgtingsmann, sum hevur spurt um málið. 

Jørgen Niclasen sigur, at høvuðsendamálið hjá Strandferðsluni er at veita somu tænastu til allar borgarar í landinum, og at allir skipanir í mest møguligan mun eisini taka atlit at tørvinum hjá teimum, sum bera brek. 

Strandferðslan hevur gott samstarv við Megd, og hevur fyrr biðið um ráðgeving og eftirmeting, eitt nú í sambandi við útbjóðing av Bygdaleiðum og byggingina av Erlu Kongsdóttir.