Íslendingar ikki rakt við lodnu enn

Íslendsku lodnuskipini hava ikki rakt við stórvegis av lodnu, og tí er fiskiskapurin ikki byrjaður enn.

Trý skip hjá Sildavinsluni, Bjarni Ólafsson, Børkur og Beitir, leita norðan fyri Ísland. 

Danska skipið Ísafold og svenska Clipperton leita djúpt og heilt norður móti grønlendska markinum.

Sildavinslan sigur, at lítið hevur verið at sæð.

Veðrið ávirkar eisini leitingina, tí skipini eru fleiri ferðir farin inn fyri veður.

Íslendsku skipini kunnu fiska tilsamans 660.000 tons av lodnu, skrivar íslendska kringvarpið, RÚV.

Føroyar eiga 30.000 tons

Føroyingar eiga 30.000 tons av lodnu í íslendskum sjógvi næsta ár.

Hana fáa nótaskipini, sum higartil hava fiskað lodnu, sigur Jacob Vestergaard, landsstýrismaður.

Lodnuvertíðin er frá hálvum januar til hálvan februar.

Føroyar eiga fimm prosent av íslendsku lodnukvotuni, tó í mesta lagi 30.000 tons.

Av tí at íslendska kvotan er so stór, eiga føroyingar 30.000 tons næsta ár.