Fáa onga løn, kunnu tey ikki vísa koronupass

Í Eysturríki verða fólk, sum ikki eru koppsett, biðin um at vera við hús, og í Italia verða starvsfólk, sum ikki vísa koronupass, send til hús við ongari løn.

Tað skrivar TV2.

Koronusmittan er aftur farin at breiða seg í Evropa.

Serliga Eysturríki er meint rakt í løtuni, og tí eru tiltøkini herd munandi. 

Í Eysturríki sleppa tey, sum ikki eru koppsett, bara út fyri dyr, um tey hava týdningarmikil ørindi, so sum at fara handils ella út at ganga.

Fólk taka undir við krøvunum

Í Italia hava koronakrøvini verið herd síðan oktober. Har skulu fólk vísa koronupass, prógv um andevni ella prógv um nýggja koronukanning, um tey ætla sær til arbeiðis. Annars verða tey send til hús við ongari løn.

Tað hevur ført til mótmælisgongur ymsastaðni í Italia, millum annað í Rom leygardagin.

Sambært Evu Ravnbøl, sum er tíðindafólk hjá TV2 í Italia, dámar fólki væl tiltøkini.

- Meginparturin av fólkinum heldur tað vera rætt at seta krøv, sum skulu haldast. Nógv eru eisini koppsett í Italia. Í løtuni eru 85 prosent av teimum, sum eru 12 ár og eldri, koppsett. og tilsamans eru 75 prosent av øllum italienarum koppsett.