Keyparin skal nú vátta, at hann er skikkaður at keypa fastogn

Ognarheimildarskjøl, tað eru skeyti, ognarbrøv og skiftirættarváttanir, skulu nú hava eina váttan um, at keyparin heldur lógina um at keypa fastogn, sum kom í gildi 11.desember.

Lógin sigur, at bara fólk, sum hava fastan bústað í Føroyum ella áður hava búð í Føroyum í samanlagt fimm ár, og
danskir ríkisborgarar, sum hava búð í ríkinum í samanlagt fimm ár, kunnu keypa fasta ogn í Føroyum uttan loyvi frá landsstýrinum.

Feløg og onnur løgfrøðilig fólk, sum hava høvuðssæti í Føroyum, kunnu eisini keypa fastogn uttan loyvi frá landsstýrinum.

Tey, sum nú keypa fasta ogn í Føroyum, skulu vátta undir revsiábyrgd, at tey halda lógina, tá tey tinglýsa keypið.

Umhvørvisstovan sigur, at er slík váttan ikki í ognarheimildarskjalinum, verður tað burturvíst.