Trý av fýra í Bretlandi herða koronuavmarkingarnar

Skotland, Wales og Norðurírland seta nú nýggjar koronuavmarkingar í gildi fyri at tálma smittuni.

Í Englandi hevur forsætismálaráharrin, Boris Johnson, ikki kunngjørt strangari tiltøk enn, hóast góðir 122.000 tilburðir av Covid-19 vórðu staðfestir í Englandi jólaaftan, skrivar BBC.

Nýggju avmarkingarnar snúgva seg millum annað um mark fyri, hvussu nógv fólk kunnu savnast bæði innan- og uttandura, og raka millum annað ferða- og frítíðarvinnuna.

Í Skotlandi kunnu nú bert 100 savnast innandura til tiltøk, har fólk standa, meðan 200 kunnu savnast innandura, um tey sita. Uttandura kunnu nú 500 vera saman.