Tíggjutals mótmælisfólk dripin í Kasakstan

Rættiligur ófriður er brostin á í Kasakstan í morgun, og sambært fronsku tíðindastovuni, AFP, sum endurgevur løgregluna, eru fleiri tíggjutals mótmælisfólk dripin í gøtunum í størsta býnum, Almaty, í morgun, skrivar NRK.

Hetta er triði dagurin, at fólk í Kashakstan mótmæla, at stjórnin hevur hækkað prísin á bensini, diesel og gassi.

Reuters skrivar, at herurin er komin inn í miðbýin í Almaty, og har verður skotið frá hond.

Kasakstan - Mynd: Ritzau Scanpix

Fleiri miðlar skriva, at fleiri mótmælisfólk lógu eftirá, tá tey royndu at taka seg inn í ein bygning í miðbýnum, og at hermenn skutu eftir teimum.

Í nátt royndu nógv víðgongd at taka týðandi stjórnarbygningar í Almaty, men herurin forðaði tí, sigur talsmaðurin hjá løgregluni, Saltanat Azirbek við Interfax.

Forsetin biðið um útlendska hjálp

Forsetin í Kasakstan, Karrym-Jomart Tokajev, segði í eini røðu í gjárkvøldið, at landið hevur biðið um hjálp úr londunum í verjusamgonguni, CSTO, til tess at tryggja lóg og landaskil og at berja yvirgangin niður, sum hann málbar seg.

Í verjusamgonguni,CSTO, er Russland størsta landið. Hini londini eru: Kasakstan, Armenia, Hvítarussland, Kirgisistan og Tadsjikistan.

Ein talsmaður fyri russiska forsetan, Vladimir Putin, sigur, at Kasakstan klárar at loysa sínar egnu trupulleikar, og at einki annað land eigur at leggja uppí.