WHO: Ov tíðliga at siga, at COVID er krímsjúka

Tað er ov tíðliga at siga, at COVID-19 er ein vanlig krímsjúka.

Tað er boðskapurin frá WHO, eftir at Spania í gjár boðaði frá, at tá hendan smittubylgjan hevur lagt seg, ætla tey at fara frá verandi tilbúgving og síggja COVID-19 sum eina vanliga krímsjúku.

- Tað er framvegis ein stór óvissa, og eitt virus, sum kann broyta seg sera skjótt og koma við nýggjum avbjóðingum. Tískil eru vit framvegis ikki komin hagar, at vit kunnu kallaCOVID-19 fyri eina endemiska sjúku, sigur tilbúgvingarleiðarin í WHO í Evropa, Catherin Smallwood.

Tá ein sjúka er endemisk, heldur enn pandemisk, merkir tað, at smittan er støðug, og altíð er í samfelagnum, men á einum lágum stigi, sum eitt nú ein vanlig krímsjúka.