Jørgen Niclasen tikin fyri rúsdrekkakoyring og fer frá sum landsstýrismaður

- Eg hevði drukkið um kvøldið og morgunin eftir fór eg óumhugsað í bilin og koyrdi at keypa morgunbreyð. Varð steðgaður av løgregluni, sum bað meg blása og vísti mær so at har stóð "positiv".

Tað sigur Jørgen Niclasen, formaður í Fólkaflokkinum, í samrøðu við VP.fo. 

Jørgen Niclasen tekur avleiðingarnar og leggur frá sær sum landsstýrismaður í fíggjarmálum. 

Jørgen Niclasen sigur við VP.fo, at hann bíðar eftir svarinum upp á blóðroyndina, ið varð tikin. 

- Hetta er eitt mistak, eg havi gjørt, og taki eg tí fulla ábyrgd í stundini, sigur Jørgen Niclasen

- Eg havi heitt á løgmann um at loysa meg úr starvi sum landsstýrismaður, sigur Jørgen Niclasen at enda við VP.fo.

Christian Andreasen, tingbólkaformaður hjá Fólkaflokkinum, sigur í stuttari viðmerking við Kringvarpið, at tíðindini eru nýggj fyri hann, men at hann skjótast gjørligt fer at kalla tingbólkin saman at viðgera støðuna.

Jørgen Niclasen, Christian Andreasen, Fólkaflokkurin, samgongukreppan

Løgmansskrivstovan boðar í kvøld í tíðindaskrivi frá, at landsstýrismaðurin í fíggjarmálum hevur í dag biðið løgmann um at verða loystur úr starvi sbr. stýrisskipanarlógini § 29 stk. 1.

Løgmaður hevur loyst landsstýrismannin úr starvi.

Sambært fráboðan um býti av málsøkjum landsstýrisins millum landsstýrismenninar, sum seinast broytt við fráboðan nr. 2 frá 6. januar 2022 § 44 stk. 3, røkir løgmaður fyribils fíggjarmál.