Jørgen Niclasen legði frá sær eftir ónøgd í baklandinum

Jørgen Niclasen leggur frá sær sum formaður í Fólkaflokkinum.

Tað boðar Fólkaflokkurin frá í tíðindaskrivi, har víst verður til, at tað eru umstøðurnar seinastu dagarnar, sum eru orsøkin til avgerðina. 

Hósdagin 10. februar var Jørgen Niclasen tikin fyri rúsdrekkakoyring í Vági. Promillan vísti 1,26, skrivaði In.fo.

Tað hevði við sær, at hann mikudagin í farnu viku legði frá sær sum landsstýrismaður í fíggjarmálum, og tók sæti aftur á tingi. 

Jørgen Niclasen verður sitandi sum formaður til landsfundin, sum eftir ætlan verður í mars. 

Ónøgd í baklandinum

Fráboðanin kemur í kjalarvørrinum av stórari ónøgd í baklandinum. 

Kringvarpið hevur seinastu dagarnar loddað dýpið í teimum átta limafeløgunum hjá Fólkaflokkinum. Greitt er, at meirilutin vildi hava formannin frá.

Misnøgdin var so mikið stór, at tað í farnu viku var orðað eitt skriv at senda formanninum, har heitt varð á hann um sjálvboðin at leggja frá sær.

Sum Kringvarpið skilir, tók ein meiriluti av limafeløgunum undir við skrivinum, men tað varð steðgað í síðstu løtu, tí feløgini vildu geva formanninum nakrar dagar til sjálvur at leggja frá sær. 

Tað hevur hann nú gjørt.