Sethúsaprísirnir hækkaðu mest í Eysturoynni, Vágum og Suðuroynni

Sethúsaprísirnir í Føroyum hækkaðu nógv í 2021.

Serliga í smærru økjunum hækkaðu prísirnir lutfalsliga mest í 2021, skrivar Betri banki.

Í Eysturoynni, Vágum og Suðuroynni hækkaðu prísirnir millum 19,5 og 25 prosent. Í høvuðstaðarøkinum og í Klaksvík hækkaðu prísirnir ávikavist 12 og níggju prosent.

Miðalprísurin fyri eini sethús í høvuðstaðnum er nú komin upp í 3,7 mió. kr.

Miðalprísurin fyri Føroyar var 2,3 mió. kr. í 2021. 

Eini miðal sethús kosta nú 1,9 mió. kr. í Eysturoynni.

Bústaðarbyrða

Bústaðarbyrðan í Tórshavn er í løtuni 34 prosent. 

Í Eysturoynni er bústaðarbyrðan 19 prosent og fyri allar Føroyar er talið 23 prosent.

Hetta svarar til ein miðalvøkstur, sum er trý prosentstig samanborið við 2020.

Bústaðarbyrðan sigur, hvussu stóran part av inntøkuni eftir skatt eitt húski skal brúka fyri at fíggja síni sethús.