Ukraina: Grava hópgravir, tí líkhúsini eru full

Myndugleikarnir í ukrainska býnum Mariopol eru farnir at grava hópgravir, skrivar AP. Tað verður gjørt, tí at líkhúsini í býnum eru full.

Volodimyr Zelenskyj, forseti í Ukraina, fordømir bumbuálopið á sjúkrahúsið í havnarbýnum Mariupol í gjár.

Hann sigur, at hetta er krígsbrotsverk og heldur tað vera eitt avgerandi prógv fyri, at tað er fólkadráp, sum verður framt móti ukrainska fólkinum.

Higartil er boðað frá, at 17 fólk eru særd, og forsetin nevnir, at fleiri fólk eisini eru deyð.

Heitir aftur á Evropa

Volodimyr Zelenskyj heitir enn einaferð á Evropa um at seta fleiri revsitiltøk í verk móti Russlandi. Hann heitir eisini aftur á Nato um at steingja ukrainska loftrúmið fyri russiskum flogførum.

Men Nato hevur fleiri ferðir sagt, at tað verður ikki gjørt.

Altjóða gjaldoyrasamstarvið hevur annars samtykt ein hjálparpakka upp á 1,4 milliardir dollarar til Ukraina. Tað svarar til umleið 9,5 milliardir krónur.