Russland hóttir við at handtaka stjórar í útlendskum fyritøkum

Russland hóttir við at handtaka stjórar í útlendskum feløgum, sum finnast at stjórnini, og at leggja hald á ognir hjá fyritøkunum og feløgum, sum fara úr Russlandi, eitt nú McDonald's, IBM og Coca Cola.

Tað skrivar Wall Street Journal.

Keldur hjá blaðnum siga, at seinastu vikuna hava feløg fingið vitjan, bræv, ella eru uppringd av fólki, har tey verða hótt við sakarmáli. 

Ávaringarnar hava m.a. gjørt, at í minsta lagi ein fyritøka hevur avmarkað samskiftið millum russisku greinina og restina av felagnum.

Fylgja við í samskiftinum 

Orsøkin skal m.a. vera stúran fyri, at russiskir myndugleikar fylgja við í samskiftinum millum starvsfólk í fyritøkuni. Onnur feløg arbeiða nú við at flyta stjórar úr Russlandi, skrivar blaðið.

Russiski forsetin, Vladimir Putin, sigur, at hann fer at taka undir við eini lóg, sum tjóðartekur ognir hjá útlendskum feløgum, sum fara úr Russlandi orsakað av russisku innrásini í Ukraina.

Fleiri fyritøkur eru longu farnar úr Russlandi med alla ella fyribils orsakað av krígnum.

Sambært Wall Street Journal siga fleiri av fyritøkunum, at tær broyta ikki ætlanirnar um at fara úr landinum hóast ávaring frá Russlandi, skrivar NTB.