Hildið verður fram at leggja felagskvotu um til eginkvotur

Árni Skaale, landsstýrismaður í fiskivinnumáum, fer at halda fram við at leggja felagskvotur um til egnar kvotur.

Hetta verður gjørt, tí besta gagnnýtsla fæst úr tilfeinginum, um loyvini verða útskrivað sum eginkvotur, sigur hann í frágreiðingini um sjófeingi, sum var løgd fyri tingið í dag.

Sjøtul var settur á hetta, tá makrelfiskiskapurin var skipaður í 2020.

Í ár er ætlanin, at føroysku rættindini eftir rækjum við Svalbard verða skipað sum egnir fiskidagar, og fiskiskapurin eftir rækjum í russiskum sjógvi skal eisini skipast við eginkvotum.

Nógv reyðæti

Áhugin fyri at fiska reyðæti í Bankarennuni er vaksandi, og mett verður, at eini sjey milliónir tons av reyðæti reka hendanvegin.

Havstovan hevur gjørt kanningar á leiðini og hevur mett, at grundarlag er fyri at fara undir royndarfiskiskap eftir reyðæti fyri at staðfesta, um grundarlag er fyri at gagnnýta reyðæti í føroyskum sjógvi burðardygt.

Fiskimálaráðið hevur givið fimm tilsagnir um royndarloyvi at fiska reyðæti í Bankarennuni, men enn er gongd ikki komin á royndarfiskiskapin, sigur Árni Skaale, landsstýrismaður, í frágreiðingini um sjófeingi.

Løgtingið fer í næstum at hava aðalorðaskifti um frágreiðingina.

Sí frágreiðingina her: