Avrikið hevur hægstu raðfestingina

Seinnapartin tekur Ungarn ímóti føroyska fótbóltslandsliðnum við kvinnum sum skal spæla sín seinasta útidyst i hesi HM-undankappingini.

Føroyski liðskiparin, Ásla Johannesen, sigur við heimasíðuna hjá Fótbóltssambandinum, at liðið er tilreiðar til enn ein torføran dyst.

 - Vit hava tað gott í hópinum og allar eru spentar at sleppa í eldin. Vit hava fyrireikað okkum væl og kenna okkum nú klárar til avbjóðingina, sigur hon við fsf.fo.

Tá londini hittust á Tórsvølli í oktober, fingu føroysku kvinnurnar eina góða byrjan, tá Lea Lisberg skoraði til 1-0 eftir horna. Tað eydnaðist kortini ikki, at varðveita leiðsluna, og Ungarn vann 7-1. 

Ásla Johannesen leggur eisini dent á, at avrikið er tað, sum liggur fremst í huganum.

 - Vit brúka alla okkara orku uppá at arbeiða við tí, sum vit royna at byggja upp. Vit hava flutt okkum rætta vegin seinastu tíðina, og vit arbeiða hart fyri at kunna møta okkara mótstøðuliði longri uppi á vøllinum, bæði fyri at gera teirra álopsspæl trupult, men eisini fyri at kunna leypa á hin vegin, sigur føroyski liðskiparin.