Útflyta minni til Russlands, men meira til onnur evropeisk lond

Útflutningurin til Russlands minkaði nógv í mars, vísa nýggjastu tølini, sum Hagstovan hevur kunngjørt.

Hann var 74 milliónir krónur. Í mars í fjør var útflutt til Russlands fyri 217 milliónir krónur.

Í mars í ár fór eingin alifiskur úr Føroyum til Russlands, bara uppsjóvarfiskur, men tann útflutningurin er minkaður nógv.

20 mió. kr. í olju

Í mars keyptu russisk skip olju fyri 20 mió. kr. í Føroyum.

Men útflutningurin til onnur lond í Evropa vaks í mars. 

Hann var 740 milliónir krónur. Í mars í fjør var hann 445 milliónir krónur.

Ongantíð áður er so nógv útflutt til Evropa í einum mánaði.