Uttanríkis- og Mentamálaráðið átalu frá umboðsmanninum

Ein samd setanarnevnd mælti landstýrismanninum í uttanríkis- og mentamálum til at seta fyrst valda umsøkjara í starv sum skúlastjóri.

Men, Jenis av Rana, landsstýrismaður, valdi ikki at fylgja tilmælinum frá setanarnevndini.

Viðkomandi, ið annars var fyrst valdur, hevur síðani klagað handfaringina av setanini til Løgtingsins umboðsmann.

Umboðsmaðurin gevur nú aðalráðnum eina átalu fyri ikki at hava givið klagaranum eina nøktandi grundgeving í setanarmálinum.

Sambært grundgevingini frá aðalráðnum varð víst á, at støði varð serliga tikið í viðmælum hjá nú setta stjóranum. Løgtingsins umboðsmaður vísir her á, at:

"Eitt nú kundi ráðið greitt gjøllari frá, hvørji ítøkiligu viðurskifti í viðmælunum, ið serliga gjørdu seg galdandi, og við støði í teimum førleikakrøvum, ið ásett vóru í starvslýsingini, lýst tann tátt ella tættir, ið vóru avgerandi fyri, at setti umsøkjarin
hevði munin."

Uttanríkis- og Mentamálaráðið skal nú geva klagaranum eina meira nøktandi grundgeving.

Grundgevingin skal lýsa, hvørji atlit vigaðu nógv fyri støðutakanina hjá landsstýrismanninum, tá ið nýggjur skúlastjóri varð settur í Vestmanna í september í fjør.

Løgtingsins umboðsmaður ger ikki meira við málið um setan av nýggjum skúlastjóra, stendur í álitinum hjá umboðsmanninum.