Pál Weihe: WHO ger ov nógv av

Hóast heimsheilsustovnurin, WHO, nú hevur kunngjørt, at apukoppar eru ein heimsumfevnandi heilsukreppa, stúrir Pál Weihe, professari í fólkaheilsu, ikki.

- Eg má siga, at eg undrist, og eg haldi, at WHO ger í meira lagi av í hesum føri, sigur Pál Weihe við Kringvarpið.

Hann sigur, at hann stúrir ikki fyri apukoppum, tí tú skal hava hava tætt samband við tann sjúka fyri at verða smittaður. Tann sjúki hevur týðilig sjúkueyðkenni, og koppingarevni er fyri apukoppar.

Pál Weihe er ikki tann einasti, sum undrast.

Ikki koronustøða

Allan Randrup Thomsen, virologur og professari á universitetinum í Keypmannahavn, heldur, at boðini hjá WHO kunnu geva fólki ta fatan, at henda støðan er tann sama sum støðan við koronafarsóttini. Og tað er hon ikki, sigur Allan Randrup Thomsen. 

Pál Weihe leggur tó aftrat, at havast skal í huga, at tá WHO úttalar seg, so er tað til allan heimin, og ikki fyrst og fremst til lond um okkara leiðir. Tað kann vera grundin til heldur stórorðaðu boðini frá WHO, sigur hann.

Fleiri enn 16.000 tilburðir av apukoppum eru nú staðfestir í 75 londum.