VIDEO: Hanna hevur vakrasta urtagarð í Klaksvík 2022

Tað var í samband við tiltakið ’Virkið vár’, sum var í mai, at ein urtagarðskapping varð útskrivað. Borgarar í Klaksvík fingu møguleika at tilnevna egnan urtagarð til kappingina, ella at tilnevna ein urtagarð, sum eftir teirra tykki hevði eina viðkenning uppiborna. 

Dómsnevndin avgjørdi, at vakrasti urtagarður í 2022 liggur á Skáltavegi 30 í Klaksvík, har Hanna Dalsenni og Mikkjal Olsen búgva.

Rannvá Fossaberg frá GMF hittir Honnu Dalsenni og Hans Hjalta Skaale, býargartnara.

Dómsnevndin sigur m.a. í grundgevingini, at urtagarðseigarin hevur megnað at fáa heilt ótrúliga nógv burtur úr einum avbjóðandi lendi. Alt er væl samanvaksið, og eingin mold er at síggja, tí planturnar eru sera væl samansettar.

Lendið í urtagarðinum er sera bratt, men kortini er hvør krókur gagnnýttur. Bæði til terassu, har lagt er upp til hvíld og hugsavnan, samstundis sum urtagarðurin er sermerktur av gomlum trøum, sum eru endurnýtt til bæði beð, beinkir og aðrar prýðislutir.

Somuleiðis sigur dómsnevndin, at úrvalið í urtagarðinum er fjølbroytt. Nógv ymisk trø, nálatrø, klivplantur, eitt ótal av staudum, rósum, átulig ber osfr.

Longri samrøða við Honnu Dalsenni og Hans Hjalta Skaale.

Í dómsnevndini sótu Jóhanna Christiansen, forkvinna í mentanarnevndini hjá Klaksvíkar Kommunu, Hans Hjalti Skaale, býargartnari, Karl Heri Joensen, KHJ nýgerð, og skrivari var Sonja N. Thomsen frá Klaksvíkar Kommunu.

Høvuðsvinningurin frá kommununi var eitt gávubræv á kr. 10.000 og eisini fingu Hanna og Mikkjal eina plantu frá býargartnaranum og eina merkisplátu til minnis um heiðurin.

Kelda: Klaksvík.fo