Finna loysn um at brúka annað mál enn danskt í fólkatinginum

Gerst tað neyðugt, fer fólkatingið at finna eina loysn, so onnur mál enn danskt kunnu brúkast á røðarapallinum í fólkatinginum, til dømis grønlendskt, enskt ella føroyskt.

Spurningurin er aktuellur nú, tí eitt valevni í Grønlandi, Hans Enoksen, sigur, at hann tosar bara grønlendskt.

Tað er hent, at fólkatingslimir úr Grønlandi hava tosað grønlendskt á fólkatingsins røðarapalli, men teir hava so sjálvir umsett til danskt aftaná. 

Hans Enoksen - Mynd: Sermitsiaq

Hans Enoksen sigur, at hann fer bara at tosa grønlendskt í fólkatinginum.

Ongar ásetingar

Fólkatingið sigur, at ongar ásetingar eru um mál í starvsreglugerðini hjá fólkatinginum.

Men gerst tað neyðugt, fer fólkatingið at finna eina loysn, sigur fólkatingið. Hetta skrivar KNR. 

Í landstinginum í Grønlandi verður tosað bæði grønlendskt og danskt.