Nýggi tollurin hjá Trump komin í gildi

Klokkan 5 í morgun, okkara tíð, kom nýggi tollurin hjá amerikanska forsetanum, Donald Trump, í gildi, og hann kann hækka uppaftur meira.

Toll- og marknaeftirlitið hevur boðað frá, at tey  í dag fara at gevast við at krevja inn tollin, sum hægstirættur fríggjadagin dømdi at vera ólógligan.

Nýggi tollurin kom sum aftursvar til avgerðina hjá hægstarætti. Hann er heimilaður á eini lóg, sum gevur forsetanum rætt til at krevja toll upp í  15 prosent í 150 dagar, uttan góðkenning frá kongressini.

Enn er ógreitt, hvat hendir, tá ið tollurin fer úr gildi.

Í boðum á sínum egna miðli, hevur Trump eisini upplýst, at hann fer at hækka tollin upp í 15 prosent. 

Sambært Bloomberg, hevur Trump ikki enn formliga givið beinleiðis boð um tað, men miðilin hevur upplýsingar, sum vísa, at Hvítu húsini arbeiða við at orða harraboðini.