Nýggj kanning skal lýsa føroysk lívskor

Hagstova Føroya fer nú fyri fyrstu ferð undir eina umfatandi kanning av lívskorunum í Føroyum. 

Kanningin skal geva føroyska samfelagnum týdningarmikla vitan um, hvussu lívskorini eru her samanborið við okkara grannalond. Hetta er vitan, vit ikki hava nú.

Vitanan kann m.a. vera góð at hava hjá teimum, ið skulu taka avgerðir.

Kanningin byggir á tann kenda EU-SILC leistin (European Union Statistics on Income and Living Conditions). Hetta er ein skipan, sum øll ES-lond og hini Norðurlondini nýta. Týdningurin av hesum er stórur:

• Sammeting: Vit kunnu fyri fyrstu ferð neyvt sammeta føroysk viðurskifti við onnur lond.

• Breidd: Kanningin fer langt út um bara inntøkutøl; hon fevnir eisini um heilsu, útbúgving, bústaðarviðurskifti og sosiala luttøku.

• Gjøgnumskygni: Hetta fer m.a. at geva eina mynd av, hvørji fólk í samfelagnum eru fyri fíggjarligum trýsti, og hvørji liva í vælferð.

Væntandi verða fyrstu føroysku hagtølini um lívskor tøk seinni í ár.

Morgunsendingin vitjaði Hagstovuna og prátaði við Lív Højsted Horsdal, hagfrøðing: