Mest hoyrdu søgurnar í morgunsendingini í ár

Tá ið árið er farið at halla, kann tað vera stuttligt at hyggja aftur á tær mongu søgurnar, sum morgunsendingin hevur borðreitt við hetta seinasta árið.

Heimasíðutoymið hevur gjørt ein topp 10 lista, sum vísir, hvørjar søgur úr morgunsendingini eru best umtóktar í 2022. Tað, sum vit kalla: mest lisið.

Listin sær soleiðis út: 

1.	Kappróðrarbátur hvølvdist á Sørvágsfirði
2.	Nakinmyndir av Rakul á netinum
3.	Karl Weihe um Ex on the Beach
4.	Ógvusligur torusláttur í Froðba
5.	Feðgar tiknir av óløgi á Eiði
6.	Danskur journalistur um dokumentarin, Druknet
7.	Elisa Vang og Magni Mohr kjakast um ovurfita
8.	Tá ið Gekkurin fór í svart
9.	Søgan um Sorin Anghel
10.	Ringur horvin í 11 ár

 

Kappróðrarbátur hvølvdist

Mest lisna søgan er tann um manningina á kappróðrarbátinum Sjóherji, sum koppaði á vestanstevnu í Sørvági í summar.

Tað vóru nakrar skelkaðar kvinnur, sum Tórður Mikkelsen hitti í sendingini, Summarmorgun, tann 18. juli 2022. 
 

 

Samrøðuna hoyra tit her. 

Dagur og vika gjørdu eisini nógv burtur úr óhappinum á Sørvágsfirði, og tað ber til at síggja innsløgini í hesi tíðindasendingini. 

 

Nakinmyndir og Ex on the Beach

Nummar tvey á listanum er ein samrøða, sum var send 19. mai í ár, tá ið Elin Michelsen hitti Rakul Højsted Hansen, sum er ein av teimum, sum fann útav, at nakinmyndir av henni vóru í umferð á netinum. 

- Eg visti ikki, hvør hevði sæð tær, og tað var ræðuligt, segði Rakul Højsted Hansen millum annað í samrøðuni. 

 

 

Triðja søgan á listanum er samrøðan við Karl Weihe, sum er við í veruleikarøðini Ex on the Beach, sum gongur á Discovery.

 

 

- Eg havi altíð droymt um tað, og eg havi altíð vitað, at eg var eitt sindur "eyka", sigur Karl Weihe.

 

Torusláttur og óhapp á Eiði

Og so var tað í februar, at ógvusligur torusláttur var í Froðba. Bjarni Nygaard, trivnaðarfólk í Tvøroyrar kommunu, greiddi frá, hvussu fólk upplivdu toruslátturin. 

Samrøðan var í morgunsendingini tann 22. februar 2022. 

Tað kundi gingið heilt galið, tá Dánjal Jákup Hammer og pápi hansara Hanus saman við øðrum royndu at flyta ein bát í illveðrinum í januar í ár. 

Menninir vóru í ferð við at fáa ein bát av bryggjuni og upp á ein lastbil, tá óløgið tók teir av fótum.

Dokumentarrøð og fiti

Í apríl mánaði var samrøða við danska journalistin Anders Lomholt, sum hevur gjørt dokumentarrøðina "Druknet" um gentuna, sum var funnin druknað við byrgingina í Hvannasundi í 2012. 

- Tá eg kom til Føroya, var tað sum at traðka á oyðimold, tí eingin gav hesum máli ans, sigur Anders Lomholt, journalistur og vertur í dokumentarrøðini.

 

Sjeynda søgan á topp 10 listanum er orðaskifti millum Elisu Vang og Magna Mohr, sum snúði seg um fiti. 

Boðskapurin hjá Elisu Vang var, at hóast tú vigar meira enn tey flestu, so kanst tú vera bæði virkin og eydnusom, meðan Magni Mohr vísir á, at tað at viga ov nógv er ein álvarsom heilsuhóttan.

 

Gekkurin og Sorin Anghel

Fríggjakvøldið 18. februar sveik tøknin í Gekkinum fullkomuliga, og tí var neyðugt at hugsa øðrvísi fyri at kunna avgreiða spælið. 

- Tíbetur var tað ikki ein nýggjur vertur, sum stóð har. Tað sigur Magnus Magnussen, sum hevur drúgvar royndir sum gekkavertur.

 

Níggjunda søgan á listanum er ein longri samrøða við fryntiliga Sorin Anghel, sum greiðir frá, hvussu hann kom til Føroya at vera saman við unnustuni og at spæla við EB/Streymi eftir at hava búð 21 ár í Rumenina. 

Tá hann sá fótbóltsvøllin á Mølini á Eiði fyrstu ferð, trúði hann ikki sínum egnum eygum:

- Eg hugsaði, at hetta ber ikki til. Hetta er ikki eitt stadion, eg kann ikki spæla á slíkum vølli, minnist Sorin Anghel, sum hevði spælt fótbólt á høgum stigi í Rumenia, áðrenn hann kom til Føroya.

 

Horvin ringur latin rætta eigaranum

Hetta er søgan um ein ring, sum var latin rætta eigaranum 11 ár, eftir at hann var horvin.

Tóra Tórgarð úr Havn hevði havt ringin í 11 ár, uttan at finna eigaran. Líka síðani á sumri 2011 hevði hon leitað, uttan úrslit. 

Men eitt sunnukvøld í oktober gjørdi hon á Facebook-bólkinum "Mist og funnið" enn einaferð vart við ringin.

Uppslagið bleiv deilt meira enn 500 ferðir, og mánakvøldið eftir fekk Tóra eini boð frá kvinnu í Danmark. 

- Eg eri bæði glað og rørd, um at eigarin er funnin, sigur Tóra Tórgarð úr Havn.