Samgongan vil leingja tíðarskeiðið fyri MVG-frítøku á el-bilum

- Nýggja samgongan ætlar at leingja tíðarskeiðið, at fólk fáa endurrindað meirvirðisgjaldið, um tey keypa ein nýggjan el- bil. Tað sigur Aksel V. Johannesen, løgmaður.

Undanfarna samgonga legði uppskot fram um at leingja tíðarskeiðið, men av tí at løgtingsval varð útskrivað 9. november, fall málið burtur.

Endurgjaldið er eftir verandi lóggávu 70.000 krónur.

Men skipanin endar 31. desember í ár, tað vil siga um tveir dagar.

- Tað hevur skund at leingja tíðarskeiðið, og tí verður hetta málið eitt tað fyrsta lógaruppskotið, sum nýggja samgongan ætlar at leggja fyri løgtingið, sigur Aksel V. Johannesen.

Hann vil tó ikki siga, um tað verður sama uppskot, sum undanfarna samgonga hevði, ella um nýggja samgongan kemur við einum øðrvísi uppskoti. 

Hann vil heldur ikki siga, um talan eisini verður um til dømis plug-in hybridakfør í nýggja uppskotinum.

Nýggja landsstýrið hevur sín fyrsta fund týsdagin 2. januar klokkan 9, og tá verður hetta málið viðgjørt.

Tað hevur eisini skund at fáa eina fíggjarlóg. Tað málið skal eisini viðgerast á fundinum týsdagin.

Aksel V. Johannesen sigur, at av tí at tað er fyrsti fundurin hjá nýggja landsstýrinum, eru ymisk formlig viðurskifti, ið eisini skulu fáast upp á pláss.