Hava heimild at taka avgerð um virksemi í alivinnuni

Vinnukærunevndin ógildaði eina avgerð hjá Landsdjóralæknanum, tí feilir vóru í málsviðgerðini og tí eisini í avgerðini. 

Millum annað var alifyritøkan ikki hoyrd um metingina um lúsastøðuna, sum landsdjóralæknin var noyddur at gera, tí alifyritøkan ikki hevði gjørt neyðugu lúsateljingarnar. 

Landsdjóralæknin noktaði einum alara at seta út tvær milliónir smolt, sum hann søkti um.

Vístu til lúsastøðuna

Heilsufrøðiliga starvsstovan og landsdjóralæknin góvu bara loyvi til hálva aðru millión.

Tey vístu til lúsastøðuna.

Men Vinnukærunevndin, sum fekk kæru frá alaranum, kolldømdi hesa avgerð.

Advokaturin hjá alaranum segði, at hvørki rakstrarkunngerðin ella lúsakunngerðin geva Heilsufrøðiligu starvsstovuni og landsdjóralæknanum grundarlag til at skerja smoltútsetingina ein fjórðing.

Heimildin er í lagi

Men heimildin at taka avgerðir um slíkar umsóknir er í lagi, siga Heilsufrøðiliga starvsstovan og landsdjóralæknin.

Tey siga, at tey hava heilt greiðar heimildir til at hava eftirlit við virkseminum og taka avgerðir um virksemið í føroysku alivinnuni. 

Henda heimild er ein grundleggjandi fortreyt fyri, at myndugleikarnir kunnu røkja sítt eftirlitsarbeiði og myndugleikaviðgerð.

Heilsufrøðiliga starvsstovan og landsdjóralæknin siga eisini, at Vinnukærunevndin ofta hevur staðfest avgerðirnar hjá teimum.