Apoteksverkið afturkallar heilivág fyri bruna

Apoteksverkið afturkallar vøruna Dicillin Sandoz 500 mg, sum eru kapslar móti bruna, og heitir á tey, sum taka hendan heilivág, at fara aftur á apotekið við honum og fáa annað slag í staðin. 

Danska heilivágsstýrið hevur gjørt vart við, at nakrir fáir sjúklingar, sum hava verið í viðgerð við nevnda heilivági, eru smittaðir við multimótstøðuførum CPO-bakterium.

Talan er um níggju sjúklingar, sum hava fingið staðfest bakteriurnar í tíðarskeiðinum frá oktober í 2022 til januar 2023.

Fáa nýggjan heilivág

Ábendingar eru um, at tað er heilivágurin, Dicillin 500 mg frá Sandoz, sum er orsøkin.

Hetta verður í løtuni kannað nærri, og tískil er heilivágurin tikin av hillunum fyribils, skrivar apotek.fo.

Apoteksverkið sigur, at tað er umráðandi, at fólk, sum eru í viðgerð fyri bruna, ikki steðga viðgerðini, men lata heilivágin inn aftur á apotekið og fáa útflýggjað nýggjan heilivág.