Løgtingið játtar neyðhjálp til Ukraina, Turkalands og Sýria

Løgtingið hevur einmælt samtykt at játta Ukraina sjey milliónir krónur í neyðhjálp. Peningurin verður latin gjøgnum ST-flóttafólkastovnin UNHCR.

Tingið hevur eisini einmælt samtykt at heimila landsstýrinum at lata eina millión krónur í neyðhjálp til Turkalands og Sýria í sambandi við jarðskjálvtarnar í báðum londunum.

Neyðhjálpin verður latin gjøgnum Reyða Kross Føroya.

Kyiv, Ukraina, russisk álop á Kyiv

Løgtingið hevur samtykt at játta sjey milliónir kr. í neyðhjálp til Ukraina. (Savnsmynd: Ritzau Scanpix)

Landsstýrið skeyt upprunaliga upp at játta hálva millión krónur til Turkalands og Sýria, men fíggjarnevndin skeyt upp at hækka upphæddina upp í eina millión kr., og tað var samtykt.

Øll 32 tingfólkini, sum vóru í tingsalinum, atkvøddu fyri uppskotinum hjá Ruth Vang, landsstýriskvinnu í fíggjarmálum.

Neyðugt var at biðja um frávik frá tíðarfreistunum, so uppskotið um neyðhjálp kundi avgreiðast í tinginum í dag.

Hoyr samrøðu, sum Kári Mikkelsen gjørdi við Ruth Vang, landsstýriskvinnu, í útvarpstíðindunum: