Løgtingsfólk og onnur almenn starvsfólk skulu strika TikTok

TikTok-bannið hevur nú eisini gjørt sítt innrás í Føroyum. 

Starvsfólk á Gjaldstovuni hava í dag fingið boð um at strika TikTok appina á snildfonum og teldlum av trygdarávum.

Leif Abrahamsen

Leif Abrahamsen er stjóri á Gjaldstovuni.

Trupulleikin ger seg galdandi, har TikTok-appin er løgd á telefonina, har Outlook, Sharepoint, Teams og aðrar arbeiðsappir frá Landsneti eru atkomiligar. 

Danski stovnurin fyri trygd á netinum hevur givið boðini um at strika appina.

30 stovnar fingið somu boð

Gjaldstovan veitir nærum 30 stovnum eina trygdartænastu. Tað eru stovnar, sum ikki hava stórar og nógvar skipanir, eitt nú ráð.

Og stovnarnir hava fingið somu boð um at strika appina, og størri stovnar eiga at gera tað eisini.

Bjørt Samuelsen

Eisini tingfólk hava nú fingið boð um at strika Tik Tok.

Tað sigur Bjørt Samuelsen, løgtingsforkvinna. 

Vilt tú vita meira um TikTok, so er tað evnið í Breddanum í morgin kl. 10.

Umfatandi TikTok-bann

Mánadagin vóru boðini úr Hvítu Húsunum, at stjórnarskrivstovurnar innan 30 dagar skuldu tryggja, at kinesiska appin, TikTok, ikki var á nøkrum telefonum ella teldum hjá tí almenna.

Sambært einum vegleiðingarskrivi hjá forsetaskrivstovuni í Washington, skulu skrivstovur hjá tí almenna tryggja amerikanskar dátur og strika TikTok-appina.

Nýtslan av kinesiskari tøkni skal minka, tí myndugleikarnir óttast fyri landsins trygd, og óttast kinesiskt njósnaravirksemi, skrivar AP tíðindastovan.

Týsdagin komu so eisini boð úr danska Fólkatinginum, sum frámælir øllum fólkatingslimum og starvsfólkum at nýta TikTok-appina á fartelefonum og teldum.

TikTok

Tað er kinesiska felagið Bytedance, sum eigur TikTok. Fyritøkan er undir illgruna fyri at lata stjórnini í Beijing upplýsingar.

Talsfólk fyri felagið hava tó, sambært AP, víst hesum aftur, og siga talan vera um misskiljingar og skeivar upplýsingar.