Konservativi flokkurin stóra afturgongd í veljarakanning

Nýggj meiningakanning í Bretlandi gevur ábending um, at Konservativi flokkurin fer at hava stóra afturgongd á valinum seinni í ár.

Var meiningakanningin valúrslitið, hevði andstøðuflokkurin Labour tryggjað sær 385 sessir í parlamentinum. 

Konservativi flokkurin hevði bara fingið 169 sessir, og tað hevði verið størri afturgongd, enn flokkurin fekk í 1997, tá ið Tony Blair tryggjaði Labour sigurin.

YouGov hevur gjørt meiningakanningina fyri blaðið Telegraph,14.000 fólk eru spurd, og tað er nógv meira enn vanligt. Konservativi flokkurin hevur bílagt kanningina, sigur blaðið.

Keir Starmer

Keir Starmer er formaður í Labour, sum stendur seg væl í veljarakanningini. (Savnsmynd: Ritzau Scanpix)

Størsta afturgongd síðani 1906

Hevði kanningin verið valúrslitið, hevði hetta verið størsta afturgongd í undirtøku hjá einum stjórnarflokki síðani 1906, skrivar Telegraph.

Aðrar kanningar hava leingi víst minkandi undirtøku fyri Rishi Sunak, forsætisráðharra, og flokki hansara. 

Í november vísti ein kanning, at Konservativi flokkurin lá 19 prosentstig aftan fyri flokkin hjá Keir Starmer, Labour.

Sunak hevur sagt, at hann væntar, at val verður í Bretlandi í seinnu helvt av 2024.