Haakon Lunov nýggjur høvuðsvenjari hjá KÍ

Norðmaðurin, Haakon Lunov, er settur sum nýggjur høvuðsvenjari hjá besta mansliðnum hjá KÍ.

Sáttmálin er galdandi í trý ár.

KÍ hevur leitað eftir nýggjum venjara, síðani fyrrverandi KÍ-venjarin, Magne Hoseth, skifti til danska felagið Lyngby í bestu donsku deildini.

Haakon Lunov er 41 ára gamal og hevur verið venjari og hjálparvenjari í bestu og næstbestu deildunum í Noregi.  Harumframt hevur hann arbeitt við spælaramenning í Celtic í Skotlandi og í akademinum hjá Everton í Onglandi.

Sambært fótbóltsmiðlinum Bolt.fo er talan um eitt óvæntað val, tí Haakon Lunov hevur bara verið høvuðsvenjari í triðbestu og fjórðbestu deildini í Noregi.