Fritzl kann latast leysur

Josef Fritzl - maðurin sum í 2009 var dømdur fyri at hava hildið dóttur sína í kynsligum trælahaldi og fyri at hava fingið sjey børn við henni - kann latast leysur. 

Tað staðfesti ein dómstólur í Eysturríki í morgun.

Fritzl er nú 88 ára gamal.

Ræðuleikarnir heima hjá Josef Fritzl í býnum Amstetten í Eysturríki byrjaðu í 1984, tá ið Josef Fritzl lumpaði tá 18 ára gomlu dóttur sína, Elisabeth Fritzl, niður í kjallaran í húsunum, har familja búði, doyvdi hana og legði hana í hondjørn.

Eitt barn doyði

Ikki fyrr enn 24 ár seinni slapp hon út. Hesi árini hevði hon átt sjey børn. Eitt barn doyði eftir føðing í 1996.

Fritzl var í 2009 dømdur fyri siðamisbrot, neyðtøku, noyðslu, avbyrging, trælahald og óviljað manndráp. 

Hann játtaði seg sekan í øllum ákærunum, og hevur síðani sitið í psykiatriskum fongsli. 

Eysturríkski dómstólurin hevur í morgun staðfest, at Fritzl hevur rætt til at vera royndarleyslatin eftir at hann hevur sitið í minsta lagi 15 ár.

Sigst vera dementur

Ein psykiatrisk frágreiðing staðfestir, at Fritzl ikki longur er til vanda fyri almenningin, millum annað tí hann sigst verða vorðin dementur.

Fritzl hevur fleiri ferðir biðið um at verða royndarleyslatin, men hevur ongantíð fingið viðhald. 

Sakførari hansara, Astrid Wagner, hevur sagt, at hon er sannførd um, at Fritzl av innasta hjarta ber angur um tað, sum hann hevur gjørt móti familju síni.