Stoltenberg: Hjálp til Ukraina er íløga í okkara egnu trygd

- Fíggjarligi stuðulin til Ukraina er ikki vælgerandi, men ein íløga í okkara egnu trygd. 

Tað segði Jens Stoltenberg, aðalskrivari í Nato, sum hevur verið á vitjan í Pentagon í USA. 

Stoltenberg vitjar í USA í eini roynd at sannføra amerikanarar um at stuðla risastóra hjálparpakkanum til Ukraina, sum republikanarar síðani í heyst hava forðað fyri.

Jens Stoltenberg og Antny Blinken

Nato-aðalskrivarin og amerikanski uttanríkisráðharrin. (Mynd: Reuters/Ritzau Scanpix)

Trygd ikki staðbundin

- Eg skilji væl, at nógv av okkara sameindu stúra fyri Kina, men tað er eingin grundgeving fyri at vera minni stúrin um Ukraina. Trygd er ikki staðbundin, men heimsfevnandi. Tað, sum hendir í Evropa, ávirkar Asia, og tað, sum hendir í Asia, ávirkar Evropa, segði Stoltenberg

- Í dag er tað Ukraina, í morgin kann tað vera Taivan. Tí hevur tað týdning fyri okkum, at vit veita vápn og stuðul, sum tey hava brúk fyri. Eg eri sannførdur um, at okkara sameindu fara at gera tað. Stuðulin frá okkum er ikki vælgerandi, hann er ein íløga í okkara egnu trygd, tí vit vita, at Beijing eygleiðir okkum neyvt, segði Jens Stoltenberg, aðalskrivari í Nato.