Foreldrafelagið Heim og skúli tekur undir við at lækka næmingatalið

Lærarin fær meira tíð til at geva hvørjum næmingi trivnað og læring. 

Minni flokkar hava eisini við sær meira frið í skúlastovuni og gera tað lættari at arbeiða við tvístøðum í flokkinum. 

Tað sigur foreldrafelagið Heim og skúli, sum tekur undir við uppskotinum hjá Barna- og Útbúgvingarmálaráðnum, at í mesta lagi 20 næmingar mugu vera í hvørjum flokki í fólkaskúlanum.

20 næmingar hóskandi

20 næmingar eru ein nóg stórur flokkur til, at næmingarnir fáa gagn av royndunum hjá hvørjum øðrum og hava verkætlanar- og bólkaarbeiði um somu tíð, sum arbeitt verður við tí sosiala, sigur felagið.

Heim og skúli halda, at best er at brúka námsfrøðingar í grunddeildina, sum er upp í triðja flokk.

Eldru flokkarnir hava gagn av útbúnum lærarum, sigur felagið.

Minni flokkar - styttri skúldag

Heim og skúli heita á kommunurnar um at leggja upp fyri floksstøddini og gongdini í fólkatalinum, tá nýggir skúlar vera fyrireikaðir. 

Tað forðar fyri, at hølini eru ov lítil, tá tey eru liðug. 

Felagið sigur, at minni flokkar gera, at til ber at stytta skúladagin.