Teldusníkar hava aftur lopið á floghavnina í Kastrup

Aftur í gjár var altjóða floghavnin í Keypmannahavn álopin av teldusníkum, ið stuðla Russlandi.

Harumframt vóru álop framd á fleiri danskar kommunur. 

Ein bólkur við teldusníkum, ið nevnir seg "NoName057," hevur á sosiala miðlinum Telegram tikið ábyrgdina av álopunum.

"NoName057" er ein av nógvum russiskt-vinarligum bólkum við teldusníkum, sum fremja álop á heimasíður, og síðani almannakunngera úrslitið á sínum Telegram-miðli.

Álop á kommunur

Sambært danska kringvarpinum hevur bólkurin boðað frá nýggjum álopum móti fleiri donskum kommunum, teirra millum Aarhus kommunu, Vejle kommunu, Odense kommunu og Horsens kommunu.

Eisini heimasíðan hjá danska flutningsmálaráðnum er á listanum hjá bólkinum.

Jan Kaastrup, sum er KT-trygdarserfrøðingur, sigur við DR, at orsøk er stúra fyri, at hesi álop við tíðini gerast alsamt meira álvarsom.

Teldusníkarnir í bólkinum "NoName057" siga, at teir halda fram við álopunum á Danmark, so leingi landið stuðlar stýrinum hjá Volodymyr Zelenskyj í Ukraina.