43 ára gamal maður tikin í størsta kokain-máli í Íslandi

Ein 43 ára gamal maður er handtikin í sambandi við kanningararbeiði hjá íslendsku løgregluni í størsta kokain-máli í søgu Íslands.

Maðurin var eftirlýstur gjøgnum Interpol í sambandi við, at 100 kilo av kokaini skuldu smuglast til Íslands. 

Kokainið var væl krógvað í trætrumlum í eini bingju, sum var send úr Brasil til Íslands við millumstøð í Rotterdam.

Níggju ára fongsul

Hollendskir tollarar funnu rúsevnið og tóku tað úr trætrumlunum, og løgdu í staðin syntetiskt evni í trumlurnar.

Fýra íslendingar vóru tá ákærdir fyri smugling, og tann, sum fekk strangasta dóm, var dømdur níggju ára fongsul.

Hægstirættur í Íslandi staðfesti eisini, at tað er prógvað, at teir fýra skipaðu fyri smuglingini saman við einum ókendum manni.

Og hildið verður, at tað er 43 ára gamli maðurin, sum nú er handtikin.