U17-fótbóltur: Vunnu bólkin eftir laka byrjan

Føroyska U17-landsliðið við gentum vann leygardagin flottan 3-1 sigur á Rumenia í síðsta dystinum í B-undankappingini, sum hevur verið í Føroyum seinastu vikuna.

Føroyar fingu eina laka byrjan við tapið fyri Lettlandi, men eftir tveir sigrar á rað á Georgia og Rumenia, eydnaðist at vinnna B-undankappingina, og tryggja sær pláss í A-undankapping næsta ár, tá pláss í EM-endaspælinum stendur upp á spæl.

Gjørdu bart

Rumenia varð mett at vera sterkasta liðið undan kappingini, men tað nervaði ikki føroyska liðið, sum legði seg framum við máli frá Brá Zakariasardóttir, tá eitt gott korter var spælt.

Beint fyri steðgin øktu Føroyar. Leona Djurhus skoraði til 2-0, áðrenn Silja Trier skoraði triðja føroyska málið í 58. minutti. Giulia Sipos minkaði um munin í yvirtíðini, men tá var sigurin longu tryggjaður.

Føroyar vunnu bólkin við seks stigum frammanfyri Lettland og Rumenia, sum eisini fingu seks stig. Niðast var Georgia við ongum stigi.