USA ávaraði Russland um yvirgangsálop

USA ávaraði longu fyri tveimum vikum síðani Russland um, at ein víðgongdur bólkur hevði ætlanir um at fremja yvirgangsálop í Moskva. 

Tað sigur ein danskur seniorgreinari:

Í minsta lagi 140 fólk lótu lív, tá ið yvirgangsmenn fríggjakvøldið tóku seg inn í Crocus City Høllina í útryðjuni av Moskva, og fóru at skjóta frá hond.

Ein grein av yvirgangsfelagsskapinum IS hevur tikið ábyrgdina fyri álopið. 

Hetta er blóðigasta álopið í Russlandi í fleiri áratíggju.

Fyri bara tveimum vikum síðani ávaraði USA Russland um, at amerikanska fregnartænastan hevði upplýsingar um, at ein bólkur av víðgongdum hevði ætlanir um yvirgangsatsóknir móti stórum tiltøkum í Moskva, eitt nú konsertir.

Yvirgangsatsókn í Moskva, Moskva

Sløkkilið rudda í toftunum, sum eru eftir av konserthøllini uttan fyri Moskva. (Mynd: Reuters/Ritzau Scanpix)

Russland eyðmýkt

- Tí eyðmýkir hetta Russland, nú yvirgangur er framdur í Russlandi, sigur Jacob Kaarsbo, seniorgreinari í tankasmiðjuni Evropa, við danska TV2. 

- Trygdarráðið í USA segði fríggjadagin, at tað hevur deilt allar fregnartænastuupplýsingar og hóttanir seinastu tíðina. So hetta er ein eyðmýking, sigur seniorgreinarin.

Sambært Jacob Kaarsbo, hevur USA ein politikk, sum áleggur teimum skyldu at deila fregnartænastuupplýsingar um yvirgang við onnur lond, sama hvussu viðurskiftini eru millum londini, skrivar danska TV2.

Jacob Kaarsbo

Jacob Kaarsbo er seniorgreinari. (Mynd: TV2)

Helt hánt um upplýsingarnar

Hóast fleiri ávaringar frá USA helt russiski forsetin, Vladimir Putin, týsdagin hánt um upplýsingarnar og kallaði tær ágangandi, eina roynd at skapa øsing og at fáa russiska samfelagið at ridla.

Fyrrapartin leygardagin boðaði russiska trygdartænastan FSB frá, at 11 fólk eru handtikin undir illgruna fyri at hava framt yvirgangsálopið fríggjakvøldið.

Hóast IS hevur tikið ábyrgd av álopinum, sigur russiska trygdartænastan, at gerningsmenninir vóru á veg til Ukraina, tá ið teir vóru handtiknir, og at teir høvdu tilknýti til Ukraina, skrivar russiska tíðindastovan Interfax.

Russiski forsetin hevði somu boð, tá ið hann seinnapartin leygardagin tosaði við russiska fólkið um yvirgangsálopið.

- Teir, sum eru undir illgruna, royndu at flýggja til Ukraina, men er nú handtiknir. Tann, sum gav boð um at fremja yvirgangsálopið, verður revsaður, segði Vladimir Putin.

Vladimir Putin

Vladimir Putin, forseti í Russlandi. (Mynd: Ritzau Scanpix)

Samansvørjing

Men danski seniorgreinarin, Jacob Kaarbo, heldur lítið um tað, sum Putin sigur.

- Tað er einki í hesum, og vit eru heilt yviri í deildini fyri samansvørjingar, sigur hann við danska TV2.

Í eini roynd at fáa endaliga staðfest ábyrgdina, hevur stjórin fyri Interpol, Jürgen Stock,  boðið sær til at hjálpa Russlandi við kanningunum. Tað skrivar hann á X.

Interpol er altjóða felagsskapur, sum skal hjálpa til at berja niður skipað brotsverk. 

Hetta er størsti altjóða felagsskapur undir ST, og 186 lond eru limir.