Bogi Simonsen var í djúpari sorg, tá hundurin doyði

Tá vit missa eitt kelidjór, kan sorgin vera ógvuliga stór. Í grundini so stór, at hon kann sammetast við, at ein familjulimur doyr.

Tað er niðurstøðan í granskingarverkætlan á Aalborg Universiteti.

- Djórini búgva saman við okkum, og vit eru saman við teimum alt samdøgrið, sigur Charlotte Glintborg, sum er knýtt at granskingini.

Men kortini uppliva fleiri, at hetta er ein sorg, sum tey ikki kunnu tosa um, tí fólk skilja hana ikki. 

Viðmerkingar sum: - Jamen hatta er bara ein hundur. Keyp tær ein nýggjan, eru ikki óvanligar, siga tey, sum varða av granskingarverkætlanini.

Bogi Simonsen átti hundin Zia. Hann var ein ógvuliga stórur og prúður Mastiff-hundur, ið vigaði heili 90 kilo.

Sjálvur var hann so ávirkaður av støðuni, tá Zia doyði, at hann als ikki fekk ein vanligan gerandisdag at rigga.

- Eg var næstan bara heima vikurnar eftir, ásannar hann.