Russiskir journalistar varðhaldsfongslaðir fyri at stuðla Aleksej Navalny

Tveir russiskir journalistar eru varðhaldsfongslaðir og ákærdir fyri at hava gjørt tilfar til eina YouTube-rás, sum verður rikin av stuðlum hjá deyða andstøðinginum Aleksej Navalny.

The Guardian skrivar, at journalistarnir Konstantin Gabov og Sergej Karelin í gjár vóru framstillaðir í rættinum í ávikavist Moskva og Murmansk, og at teir nú kunnu fáa ein fongsulsdóm uppá millum tvey og seks ár fyri "luttøku í einum víðgongdum felagsskapi." Rættarmálið móti teimum byrjar um nakrar mánaðir.

Gabov hevur fyrr arbeitt fyri eitt nú Reuters, og Karelin hevur arbeitt fyri Associated Press og var eisini kameramaður hjá Deutsche Welle fram til 2022, tá myndugleikarnir tveittu Deutsche Welle út úr Russlandi.