Tryggingin rindar fyri eldsbrunan á Børsinum

Tryggingin rindar rokningina eftir ógvusliga eldsbrunan á Børsinum 16. apríl í ár.

Dansk Erhverv, sum eigur søguliga bygningin, stóð til at missa eina trísiffraða milliónaupphædd, eftir at ein stórur partur av Børsinum fór illa av eldsbrunanum.

Men nú er greitt, at eldurin ikki fær fíggjarligar avleiðingar fyri Dansk Erhverv, skrivar miðilin Finans. 

Virðið á 400 ára gamla Børsinum er mett at vera umleið 400 milliónir krónur. Virðismetingin verður ikki broytt, tí danska tryggingarfelagið IF Forsikring rindar kostnaðin at byggja Børsin upp aftur.

- Orsøkin er fyrst og fremst, at vit hava eina skynsama trygging, sigur Lars Daugard Jepsen, varastjóri í Dansk Erhverv, við Finans.