Altjóða flogvøllur í Grønlandi aftur seinkaður

Fólk í triðstørsta býnum í Grønlandi, Ilulissat, fáa ikki altjóða flogvøll enn.

Í Ilulissat er ein flogvøllur, sum heimastýrið hevur avgjørt at byggja út og gera altjóða.

Verkætlanin byrjaði í 2016, og flogvøllurin skuldi eftir ætlan vera liðugur í ár, men byggingin er seinkað, og nýggi flogvøllurin verður í fyrsta lagi liðugur í 2026.

Tað sigur byggifyritøkan við grønlendska kringvarpið KNR.

Tørvur á arbeiðsmegi

Arbeiðið er útsett fleiri ferðir. Hesa ferð er orsøkin til seinkingina, at tørvur er á arbeiðsmegi, tólum og eykalutum.

Í Nuuk verður eisini arbeitt við at útbyggja og gera flogvøllin altjóða. Tað arbeiðið verður væntandi liðugt í ár.

Sum er, er einasti altjóða flogvøllur í Grønlandi í Kangerlussuaq.