Fara nú at seta leiðara fyri Bú- og heimatænastuna í Suðuroy

Stýrið fyri Bú- og heimatænastuna í Suðuroynni fer í dag at hava fund um tilgongdina at seta leiðara fyri Bú- og heimatænastuna í oynni.

Fimm umsóknir eru til starvið.

Kristin Michelsen, formaður í stýrinum fyri Bú- og heimatænastuna, sigur í stuttari viðmerking við útvarpið, at allir fimm umsøkjararnir eru bodnir til setanarsamrøðu. Samrøðurnar verða týsdagin 25. juni.

Hava søkt tríggjar ferðir

Neyðugt hevur verið at søkja tríggjar ferðir eftir leiðara til Bú- og heimatænastuna, tí meirlutin í stýrinum vrakaði innstillingina frá einum meiriluta í setanarbólkinum. 

Bú- og heimatænastan í Suðuroy er kommunala samstarvið fyri eldraøkið í oynni.

Í stýrinum fyri Bú- og heimatænastuna er eitt umboð fyri hvørja kommunu í oynni, men Tvøroyrar kommuna og Vágs kommuna hava tvey umboð í part.