Ungarn og Sveis renna aftaná Týsklandi

Í gjár vann Týskland stórt á Skotlandi og legði seg á odda í bólki A. Í dag fara Ungarn og Sveis at gera sítt ítasta fyri at fylgja týskarum.

Tey bæði londini hittast í fyrsta dystinum í dag klokkan 14:00. Ungarn vann sín undankappingarbólk framman fyri millum annað Serbia, meðan Sveis endaði nummar tvey í sínum bólki aftan fyri Rumenia.

Seinni fer bólkur B av bakkastokki.

Tvey av londunum, sum hava verið frammarlaga síðstu 15 árini, Spania og Kroatia, bresta saman klokkan 17:00, meðan Italia sparkar sína verju av EM-heitinum í gongd klokkan 20:00 ímóti Albania, sum er við í EM-endaspælinum fyri bert aðru ferð.

Kringvarpið sendir dystin millum Italia og Albania.