Kærur um landsstýrisfólk verða ikki viðgjørdar fyrr enn í august

Tað verður í fyrsta lagi í august, at landsstýrismálanevndin fer at hava fund um kærurnar um landsstýrisfólkini Dennis Holm og Ingilín D. Strøm.

Árni Skaale, tingmaður, kærdi Dennis Holm um svartkjaftabýtið.

Jacob Vestergaard, tingmaður, kærdi Ingilín D. Strøm.

Hann sigur, at hon segði ósatt fyri tinginum, tá hon segði, at hon ikki hevði fingið ábendingar um, at trupulleikar eru við langtíðarhaldførinum hjá Húsalánsgrunninum og Bústøðum.

Svar er komið

Jacob Vestergaard sigur, at í frágreiðing hjá Landsgrannskoðanini eru greiðar ábendingar um, at langtíðar haldførið hjá Húsalánsgrunninum ikki er í lagi.

Landsstýrismálanevndin spurdi Landsgrannskoðanina, um hon hevur sagt tað.

Svar er komið haðani. Tað er sent Ingilín D. Strøm til ummælis. 

Hon hevur tríggjar vikur at ummæla svarið. 

Dennis Holm bað um og fekk longur freist enn tær tríggjar vikurnar, sum hann av fyrstan tíð fekk, sigur Hans Jacob Thomsen, formaður í landsstýrismálanevndini.