Fer frá sum aðalstjóri, men verður ráðgevi í Løgmálaráðnum

Turid Arge fær eina átalu og fer frá sum aðalstjóri í Heilsumálaráðnum.

Samstundis verður hon ráðgevi í Løgmálaráðnum.

Tað boðar Løgmansskrivstovan frá.

Brotið tænastumannalógina

Løgmansskrivstovan hevur fingið endaligu frágreiðingina frá kanningarleiðaranum, Jens Nørtved, sum hevur gjørt tænastumannakanningina av Turid Arge, nú fyrrverandi aðalstjóra í Heilsumálaráðnum.

Kanningarleiðarin staðfestir í sínari niðurstøðu, at tey viðurskifti, sum umboðsmaðurin átalaði, og Løgmansskrivstovan reisti illgruna um, eru framd av aðalstjóranum.

Kanningarleiðarin sigur í sínari niðurstøðu, at Turid Arge hevur brotið § 9 stk. 1 í tænastumannalógini, við at seta til viks ásetingar í innlitslógini, fyrisitingarlógini og lóg um Løgtingsins umboðsmann.

Sambært grein 9, stykki 1 í tænastumannalógini, skal tænastumaður:

"samvitskufult halda tær fyri starv hansara galdandi reglur, og skal bæði í og uttan fyri tænastu vísa slíkan atburð, sum starvi hansara sømir."
 

Ráðgevi í Løgmálaráðnum

Løgmansskrivstovan og Turid Arge hava samstundis gjørt semju um, at Turid Arge fer úr starvi sum aðalstjóri í Heilsumálaráðnum, og í staðin verður ráðgevi í Løgmálaráðnum. 

Semjan merkir, at Turid Arge varðveitir sína aðalstjóraløn, men eftir trý ár fellur serliga aðalstjóraviðbótin burtur.

Løgmansskrivstovan fer eftir summarfrítíðina at lýsa starvið sum aðalstjóri í Heilsumálaráðnum leyst.

Bjørgfríð Ludvig heldur fram sum fyribilssettur aðalstjóri í Heilsumálaráðnum, til nýggjur aðalstjóri er settur.

Øll niðurstøðan hjá kanningarstjóranum kann lesast her.